Bodensee Rundfahrt: Tag 1 – Konstanz nach Meersburg

13 Mai Bodensee Rundfahrt: Tag 1 – Konstanz nach Meersburg

Scho viel hemmer devo gredt und jetzt machemers au. Eimol um de Bodesee mit em Velo. Nochdem mer am Samstig us Alass vom alljährliche Muettertag gschnell uf Herisau es bsüechli go abstatte sind und grad no die letschte Sache für dTour go hole sind, zum üsi Usrüstig z'komplettiere, hemmer üsi 7 Sache packt und üsi Route plant. Am Mäntig morge simmer am 7:00 ufgstande, hend en starke zMorge gesse und dVelo packt. Am 7:30 ischs los gange.. mitem Velo zWil an Bahnhof uf de 8:01 Zug uf Krüzlinge. zKrüzlinge acho, de GPS Logger gstartet und ab in Richtig Konstanz links um de Bodesee. (A dere Stell sei gesagt dass mir de Untersee wegloh hend) sWetter het am Afang nöd recht wölle mitspiele, das isch üs aber (zu dem ziitpunkt no) egal gsi. Trotz liechten fiserle simmer Top Motiviert vo Krüzlinge über Konstanz in Richtig Ludwigshafen gradlet. Ab und zue het dSunne möge dur dWolke drucke, was mer merklich ade Körpertemperatur gspürt het. zLudwigshafe acho, hemmer üs am Mittag im EDEKA gstärkt und hend üs wiiter uf de Weg richtig Meersburg gmacht. Ufem Weg ide schöne, idyllische Landschaft, hemmer ab und zue es Päusli zum Fötele und gnüsse gmacht. Im wunderschöne Städtli Meersburg acho (ca. 16.00), hemmer üs grad uf dSuechi nacheme schlofplätzli gmacht. dUswahl isch riiesig.. überall werbets mit Schilder wie "Gasthaus", "Zimmer frei" etc. Intuitiv hemmer üs für es herzigs italienischs Hotel entschiede. Frisch duschet und umzoge hemmer unterem Sunneschii sAltstädtli Meersburg entdeckt.. direkt am schöne Bodesee mit direktem Blick uf Konstanz! Nocheme feine Gourmet-Menü (natürlich mit frischem Fisch usem Bodesee) hemmer ade Promenande de Sunneuntergang mit Kaffi & Dessert gnosse. Alles i Allem hemmer en super Start gha. Trotz zum Teil gfühlti isiger Kälti hemmer de Tag mit rund 72 km super vo Krüzlinge noch Meersburg gmeisteret. Morn gohts wiiter über Friedrichshafen nach Bregenz. En wiitere Bricht folgt natürlich.. zum Tag 2 Jetzt kuschle ich mich fest a mis liebste Schätzli wo bereits vollumfänglich mit de Bettdecki ideckt isch und dÄugli kum me cha offe bhalte! 🙂